Ályktun stjórnar FÍSOS vegna skipulagsbreytinga á Þjóðminjasafni Íslands
Stjórn Félags íslenskra safna- og safnafólks (FÍSOS) harmar þá ákvörðun Þjóðminjasafns Íslands að leggja niður stöður sérfræðinga á kjarnasviði safnsins. Um er að ræða mikilvægar stöður þar sem verkefnin hafa ekki aðeins snúið að innra starfi Þjóðminjasafns Íslands heldur allra menningarminjasafna landsins og minjavörslu á öllu landinu.
Hlutverk Þjóðminjasafns Íslands sem höfuðsafns er samkvæmt lögum að “stuðla sem best að varðveislu íslenskra menningarminja og miðla sögu þjóðarinnar”. Eftir uppsagnir lykilstarfsmanna á kjarnasviði vakna spurningar um hvernig safnið hyggst uppfylla þessar lagalegu skyldur sínar. Þjóðminjasafn Íslands er jafnframt háskólastofnun sem á að efla rannsóknir á menningararfinum og því skýtur það skökku við að skorið skuli niður meðal sérhæfðs vísindafólks safnsins.
Stjórn Félags íslenskra safna- og safnafólks beinir þeim tilmælum til stjórnvalda að tryggja höfuðsafni þjóðminja, Þjóðminjasafni Íslands, nægjanlegt rekstrarfé til að það geti sinnt lögbundnu hlutverk sínu og hafi svigrúm til að breikka sérfræðiþekkingu innan starfsmannahópsins án þess að þurfa að grípa til uppsagna annarra sérfræðinga. Safnastörf eru sérhæfð störf sem krefjast víðtækrar þekkingar og reynslu. Þjóðminjasafn Íslands hefur ákveðnu forystu- og stuðningshlutverki að gegna í íslensku safnasamfélagi og með fækkun sérfræðinga er vegið að undirstöðum safnastarfs, ekki bara Þjóðminjasafnsins, heldur einnig allra safna á landinu. Stjórn Félags íslenskra safna- og safnafólks skorar á stjórnvöld og Þjóðminjasafn Íslands að standa vörð um mikilvægt innra starf safna því tilvist og starf þeirra byggir að öllu leyti á sterkum faglegum grunni.
10. maí 2025 – Stjórn Félags íslenskra safna og safnafólks
