All posts by admin

Farskóli safnmanna á Siglufirði 2017 – Söfn í stafrænni veröld – farskólaskýrsla

Dagana 27.-29. september 2017 fór fram hin árlegi farskóli safnmanna á Siglufirði. Dagskráin var með hefðbundnu sniði; sambland fyrirlestra, vinnustofa, skoðunarferða og almennrar gleði. Yfirskrift skólans var Söfn í stafrænni veröld.

Í ljósi þess að undanfarna áratugi hefur tækniþróun fjölgað möguleikum safna til miðlunar svo um munar var ákveðið að leggja fram ýmisskonar spurningar og skipuleggja dagskrána út frá þeim. En íslensk söfn hafa tileinkað sér ólíkar og fjölbreyttar leiðir til að miðla þekkingu og fróðleik.

Á farskóla 2017 var horft til áskorana, ógnana og nýrra möguleika í því samhengi. Hvernig geta söfn nýtt sér tæknina til framþróunar og vaxtar? Getur tæknin dregið úr upplifun gesta á sýningum? Hvernig má nýta tækni nútímans til þess að átta sig á ráðgátum fortíðar og tryggja varðveislu gripa og muna til framtíðar?

Markmið farskólastjórnar var allir gætu fundið eitthvað við sitt hæfi – því þó við störfum öll á sama vettvangi geta störf okkar verið æði ólík með tilliti til sérhæfingar, menntunar og hlutverks í starfi.

Farskólastjóri og farskólastjórn hefur nú skilað stjórn FÍSOS skýrslu um dagana á Siglufirði og er henni færðu bestu þakkir fyrir. Stjórn FÍSOS hvetur félagsmenn að kynna sér skýrsluna við fyrsta hentugleik. Farskólastjórn 2017: Anitu, Steinunni Maríu, Haraldi Þór, Sigríði og Herði eru færðar bestu þakkir fyrir þeirra góðu vinnu.

Söfn í stafrænni veröld. Farskólaskýrsla 2017

FÍSOS – Aðalfundur 10.10.2018

Stjórn FÍSOS – Félags íslenskra safna og safnmanna boðar hér með til aðalfundar félagsins miðvikudaginn 10. október 2018 kl. 17.00 á Sjóminjasafninu í Reykjavík, Grandagarði 8, 101 Reykjavík.

Dagskrá aðalfundar:

A. Kosning fundarstjóra og fundarritara.

B. Skýrsla formanns um störf félagsins.

C. Ársreikningur félagsins.

D. Umræður um árskýrslu og ársreikning og afgreiðsla reikninga.

E. Lagabreytingar.

F. Kosning í stjórn og aðrar trúnaðarstöður. Kosning skal vera leynileg.

1. Kosning fimm manna stjórnar til tveggja ára í senn, formaður og meðstjórnandi annað árið en varaformaður, gjaldkeri og ritari hitt árið.

2.  Kosning tveggja varamanna til tveggja ára, eins varamanns annað árið en annars hitt árið.

3. Kosning skoðunarmanns reikninga til tveggja ára, eins skoðunarmanns annað árið og annars skoðunarmanns hitt árið.

4.  Kosning farskólastjóra til eins árs.

G. Ákvörðun ársgjalds félagsmanna og stofnana.

H. Önnur mál.

Óskað er eftir framboðum til stjórnar í stöðu formanns, meðstjórnanda og varamanns. Áhugasamir geta lýst yfir framboði með því að senda tölvupóst á stjorn@safnmenn.is eða lýst yfir framboði á aðalfundi. Kjörgengi hafa þeir félagsmenn sem greitt hafa árgjald félagsins fyrir aðalfund eða eru heiðursfélagar.

Vægi atkvæða á fundum félagsins er einn félagsmaður, eitt atkvæði og ein stofnun, eitt atkvæði. Fer forsvarsmaður stofnunar með atkvæði hennar á fundum félagsins eða fulltrúi í umboði hans.

Í stjórn félagsins 2017-2018 sitja:

Formaður: Helga Maureen, Borgarsögusafn Reykjavíkur.

Varaformaður: Gunnþóra Halldórsdóttir, Kvikmyndasafn Ísland.

Gjaldkeri: Jón Allansson, Byggðasafnið á Görðum.

Ritari: Ingibjörg Áskelsdóttir, Borgarsögusafn Reykjavíkur.

Meðstjórnandi: Linda Ásdísardóttir, Byggðarsafn Árnesinga.

Varamenn: Haraldur Þór Egilsson, Minjasafnið á Akureyri og Hjörtur Þorbjörnsson, Grasagarður Reykjavíkur

 

Auglýsing frá RANNÍS – Rúmenskir þróunarstyrkir EFTA

Rúmenskir þróunarstyrkir EFTA – á sviði lista og menningar samstarf við Rúmeníu.  Rúmenía veitir ferðastyrki til íslenskra þátttakenda sem óska eftir samvinnu við Rúmena á sviði menningarverkefna eða á sviði menningararfs. Sótt er um beint til Rúmeníu:

Netfang: bilatral@ro-cultura.ro<mailto:bilatral@ro-cultura.ro>

Sjá nánar:

https://www.ro-cultura.ro/en/calls/bilateral-initiatives/open-call-for-bilateral-initiatives-12018

Íslendingar fá 1280 evrur í styrki fyrir 3 daga ferð.

Umsóknartímabil er frá 2. júlí til 9. nóvember 2018.

—————————————

Einnig er auglýst eftir umsóknum um þátttöku á tengslaráðstefnu um menningarverkefni sem haldin verður í Búkarest dagana  12. – 13. september 2018, sjá https://www.ro-cultura.ro/en/news/programme-news/matchmaking-event-2018-ro-culture-programme

Frekari upplýsingar veitir:

Rannis, Borgartúni 30, 105 Reykjavík. Sími: 515 5850

Netfang: ragnhildur.zoega@rannis.is

 

Ráðstefna NKF í Hörpu 26.-28. september 2018

FRÉTTATILKYNNING FRÁ NKF Á ÍSLANDI:

Nú stendur yfir skráning á ráðstefnuna; Cultural heritage facing catastrophe: Prevention and recoveries, sem haldin er af Íslandsdeild Norrænna forvarða.

Ráðstefnan verður haldin í Hörpu dagana 26. – 28. september 2018. Fjöldinn allur af sérfræðingum munu flytja erindi á ráðstefnunni, hvaðanæfa úr heiminum.  Dagskráin er fjölbreytt og á ráðstefna sem þessi erindi til allra þeirra sem með menningararfinn fara.

Við hvetjum ykkur því eindregið til þess að skrá ykkur og nýta þetta einstaka tækifæri!

Snemmskráningu lýkur þann 26. júní.

Sjá allt um ráðstefnuna hér: www.nkf2018.is

Hlökkum til að sjá ykkur í september!

NKF – Ísland

Listasafn Árnesinga hlýtur Íslensku safnaverðlaunin 2018

Forseti Íslands Guðni Th. Jóhannesson afhenti Listasafni Árnesinga Íslensku safnaverðlaunin 2018 við hátíðlega athöfn á Bessastöðum í dag, þriðjudaginn 5. júní kl.16. Íslensku safnaverðlaunin er viðurkenning veitt annað hvert ár íslensku safni fyrir framúrskarandi starfsemi.

Í greinagerð valnefndar segir að Listasafn Árnesinga bjóði upp á fjölbreyttar og metnaðarfullar sýningar sem veita gott aðgengi að myndlistararfi þeim sem það varðveitir. Safnið kynnir einstaka listamenn á einka- og samsýningum og hefur verið í samstarfi við önnur söfn um sýningar um árabil. Útgáfur safnsins eru til fyrirmyndar þar sem gefin er út vönduð sýningarskrá í tengslum við hverja sýningu, sem er mikilvæg heimild um starf og sýningar safnsins. Safnið heldur úti markvissu fræðslustarfi þar sem unnið er með mismunandi skólastigum, listamönnum, fræðimönnum og almenningi. Námskeið og smiðjur eru haldnar reglulega fyrir almenning þar sem gefst kostur á að vinna með mismunandi miðla í tengslum við sýningar safnsins. Listasafn Árnesinga var á sínum tíma fyrsta listasafnið utan höfuðborgarsvæðisins sem opið var almenningi og hefur sýnt sig og sannað sem öflugt og framsækið listasafn. Mat valnefndar er að sú áhersla í sýningarhaldi sem fylgir meginmarkmiði Listasafns Árnesinga um að efla áhuga, þekkingu og skilning almennings á sjónlistum sé til fyrirmyndar. Safnið beitir árangursríkum aðferðum í fræðslu með umræðum og uppákomum, sem bera vitni um metnað, fagmennsku og nýsköpun.

Listasafn Árnesinga, Grasagarðurinn í Reykjavík, og Varðveislu- og rannsóknasetur Þjóðminjasafns Íslands hlutu viðurkenningu fyrir tilnefningar til safnaverðlaunanna 2018. Tilkynnt var um tilnefningar til Safnaverðlaunanna 2018 í tilefni af Alþjóðlega safnadeginum þann 18. maí sl. Valnefnd Íslensku safnaverðlaunanna 2018 skipa þau Margrét Sveinbjörnsdóttir, menningarmiðlari (formaður), Rannver H. Hannesson, varðveislustjóri Landsbókasafn Íslands – Háskólabókasafn, Pétur Sörensson, forstöðumaður Safnastofnunar og Þóra Sigurbjörnsdóttir, verkefnastjóri safneignar, Hönnunarsafni Íslands sem tók við af Ólöfu Breiðfjörð, verkefnastjóra Menningarhúsanna í Kópavogi. Fulltrúi Byggðasafns Skagfirðinga sem hlaut verðlaunin 2016 var Sigríður Sigurðardóttir, fyrrum forstöðumaður.

Íslandsdeild Alþjóðaráðs safna (ICOM) og Félag íslenskra safna og safnmanna (FÍSOS) standa saman að Íslensku safnaverðlaununum sem er viðurkenning veitt annað hvert ár íslensku safni fyrir framúrskarandi starfsemi. Sem fyrr gátu almenningur, stofnanir og félagasamtök sent inn ábendingar um safn eða einstök verkefni á starfssviði safna sem þykja til eftirbreytni og íslensku safnastarfi til framdráttar.

Ljósmyndir – Sigurður Trausti Traustason.

Framtíð safna á Íslandi: Eru söfn á stefnuskrá flokkanna? – Samfylkingin í Reykjavík

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?

Menningarstefna borgarinnar er okkar leiðarljós enda hafa fulltrúar okkar tekið þátt í mótun hennar í borginni síðustu árin. Menningarstefnunni fylgir aðgerðaráætlun sem fylgt er eftir með markvissum hætti. Reykjavík er skapandi menningarborg, vettvangur fyrir skapandi fólk og viðburði og þar leika söfnin stórt hlutverk.  Samfylkingin mun styðja þétt við menningar- og safnastarf í borginni á næsta kjörtímabili líkt og síðustu ár.

Nokkur atriði um menningarmál úr stefnu Samfylkingarinnar í Reykjavík:

„Menningarborgin Reykjavík – aðdráttarafl fyrir listsköpun. Reykjavík er heimili handritanna okkar fornu, sem UNESCO telur til menningarminja alls heimsins. Hús íslenskunnar gefur tækifæri til að setja upp löngu tímabæra sýningu á þessum merku gripum og setja þá í alþjóðlegt samhengi. Þarna eiga borgaryfirvöld og ríkið að taka höndum saman.“

„Komið verði á fót Menningar- og heilsukorti fatlaðra í Reykjavík sem veiti gjaldfrjálsan aðgang að bókasöfnum og öðrum söfnum á vegum borgarinnar sem og í sundlaugar. Þá fá allir boð um heilsueflandi heimsókn þar sem kortið er kynnt og hvað sé í boði í nærumhverfinu sem tengist kortinu.“

„Stækkun og efling Borgarbókasafns í Grófarhúsi er mikið tækifæri til að víkka hlutverk safnsins og hússins sem lifandi og fjölbreytt menningar-, margmiðlunar-, lýðræðis-, barna- og bókahúss fyrir alla borgarbúa. Áfram verði unnið að því að þróa nýmæli í bókasöfnum og menningarhúsum hverfanna.“

„Stilla þarf gjaldtöku fyrir þjónustu borgarinnar í hóf, einkum með hliðsjón af hagsmunum barnafólks, stúdenta, fatlaðs fólks, aldraðra og öryrkja. Halda áfram að bjóða afslætti fyrir eldri borgara eins og frítt í sund og á söfn fyrir alla 67 ára og eldri í borginni.“

„Mikilvægt er að hvetja og styðja enn frekar við samstarf leik- og grunnskóla borgarinnar við söfn, menningarmiðstöðvar og leikhús borgarinnar.“

Menning er mannréttindi: ,,Tryggja þarf aðgengi allra borgarbúa að listum og menningu, bæði sem þátttakendur og njótendur.’’ Stefnuna má finna á xsreykjavik.is.

Hvaða hlutverki gegna söfnin í þínu sveitarfélagi? 

Söfnin sem Reykjavíkurborg rekur eru meðal þeirra öflugustu á landinu og eru í sífelldri þróun. Borgarsögusafn sameinar söfnin í borginni, þar undir eru Árbæjarsafn, Landnámssýningin, Ljóssmyndasafn Reykjavíkur, Sjóminjasafn Reykjavíkur og Viðey.  Safnið hefur stórt hlutverk, það varðveitir menningarminjar í Reykjavík og veitir almenningi greiðan aðgang að menningararfinum.  Listasafn Reykjavíkur er leiðandi safn á sínu sviði þar sem nýlega var samþykkt að hækka laun til listamanna sem þar sýna verulega. Sýningar í Listasafni Reykjavíkur, Hafnarhúsinu, Kjarvalsstöðum og Ásmundarsal eru margar yfir árið og vekja gjarnan athygli út fyrir landsteinana. Listasafnið sýnir okkur það nýjasta í samtímalistinni sem og menningararfinn okkar, færir okkur það besta í innlendri og erlendri myndlist. Safnið hefur margþætt hlutverk sem vettvangur söfnunar, rannsókna og miðlunar á íslenskri myndlist. Hlutverk Listasafns Reykjavíkur og Borgarsögusafns er því afar mikilvægt fyrir borgina og  til þess að rækta áfram hlutverk sitt þurfa söfnin áfram góðan stuðning frá borgaryfirvöldum.

Jafnvægi þarf að ríkja í safnastarfi, milli þjónustu við íbúana sem er hluti af skilgreindu samfélagslegu hlutverki safna og svo ferðaþjónustunnar. Söfn Reykjavíkur eru afar meðvituð um samfélagslegt hlutverk sitt og taka þar bæði mið af menningarstefnu borgarinnar og mannréttindastefnu þar sem fram kemur að menning sé mannréttindi. Engu að síður eru söfn öflugir ferðaþjónustuaðilar, þau hafa burði til þess að taka á móti gestum borgarinnar og miðla sögu og menningu á vandaðan og faglegan hátt. Söfnin okkar hafa þá stöðu að ná yfir landamæri og afar brýnt er að viðhalda þeirri stöðu hjá söfnunum í Reykjavík. Söfnin leggja rækt við gott samstarf við ýmsa hópa samfélagsins, ólíka markhópa og stofnanir og eru virkir þátttakendur í samfélagsumræðunni, borgarþróun og til að bæta lífsgæði borgaranna. Fræðsla leik- og grunnskólabarna er meðal hlutverka safnanna enda er miðlun mikilvæg til þess að vekja áhuga almennings á því frábæra starfi sem þar fer fram.

Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?

Tengslin eru náttúrlega mismikil milli sveitarfélaga en nær allir ferðamenn sem koma til Íslands koma til Reykjavíkur og langflestir þeirra gista hér. Söfnin hafa því fundið verulega fyrir aukningu erlendra gesta í kjölfar ferðamannastraumsins. Söfnin þurfa að vera meðvituð um þarfir ferðamanna en láta það ekki stjórna safninu. Vel hefur verið haldið á þessum málum hjá söfnunum í Reykjavík enda vilja ferðamenn sjá það sem heimamenn vilja sjá. Tengls ferðaþjónustu og safna eru afar mikil enda sjáum við sem dæmi að flestir gestir á Landnámssýningunni í Aðalstræti eru erlendir ferðamenn. Það eru fleiri sóknarfæri til að höfða til erlendra ferðamanna en það þarf að passa upp á jafnvægið og styðja við söfnin til þess að þau hafi burði til þess að taka á móti og sinna auknum fjölda ferðafólks.

Hvað hefur áunnist í safnamálum í sveitarfélaginu á síðastliðnum árum?

Stóra myndin: Í lok síðasta kjörtímabils urðu miklar breytingar á starfsumhverfi og skipulagi í safnastarfi hjá borginni, með stofnun Borgarsögusafns Reykjavíkur og sameiningu allra sögusafna borgarinnar. Það er í takti við strauma erlendis, s.s. á Norðurlöndunum og eins áherslur hjá safnaráði, að stuðla að og hvetja til þess að söfn verði eflist, m.a. með sameiningu – verði einfaldlega stærri og burðugri einingar til að geta tekist á við sífellt auknar áskoranir. Á þessu kjörtímabili var unnið eftir þeirri stefnumótun sem lögð var til grundvallar að stofnun Borgarsögusafns. Borgin hefur staðið þétt að baki safnsinu og árangursmælikvarðar sýna að þeim markmiðum sem sett voru hafa og eru nást.

Eitt af stærstu verkefnum hins nýja safns var endurnýjun Sjóminjasafnsins á Grandanum; bæði viðgerð á húsnæði og alveg ný grunnsýning. Þetta er afar viðamikið og metnaðarfullt verkefni sem mun skipta sköpum fyrir safnið, en einnig mannlífið og menninguna á Grandanum. Söfn eru og eiga að vera virkir þátttakendur í samfélaginu og m.a. þátttakendur í borgarþróun.

Borgarsögusafn hefur í samstarfi við hollvinasamtök Óðins og Hollvinasamtök Magna unnið ötullega að viðhaldi þeirra skipa sem safninu tilheyra og liggja við festar á Vesturbugt. M.a. samþykkti borgarráð styrki fyrir slipptöku Magna og viðgerð. Var það gríðarlega mikils virði, því viðhald skipa á söfnum er ekki einfalt mál.

Á kjörtímabilinu var opnað nýtt og sérhannað varðveisluhús á Árbæjarsafni, sem segja má að sé bylting í varðveislumálum og leigusamningar um fjargeymslur endurnýjaðir. Enn eru til skoðunar hugmyndir um sameiginlegt varðveislusetur menningarverðmæta fyrir söfn borgarinnar. Í ár er verið að vinna enn frekar að varðveislumálum á Árbæjarsafni, með brýnum umbótum á eldvörum í gömlu munageymslum safnsins og byggingu á skýli fyrir eimreiðina Pioneer og gufuvaltarann Bríeti – sem eru dýrgripir í eigu borgarinnar. Því miður erum við stundum minnt á það að geymslumál, eða varðveislumál skipta gríðarlegu máli, nú síðast þegar bruninn varð hjá Geymslum í Garðabæ.

Árbæjarsafn hefur blómstrað, í fyrra var haldið upp á 60 ára afmæli þess og í vetur var opnunartími safnsins aukinn með vetraropnun alla daga. Það er mjög mikilvæg þjónusta fyrir íbúa borgarinnar, en einnig erlenda gesti. Árbæjarsafn hefur tekið þátt í hverfaskipulagi fyrir Ártúnsholt og Árbæ og er það eitt af markmiðunum, að tengja safnið enn betur við útivistarparadísina í Elliðaárdal. Það hefur m.a. sýnt sig í könnunum meðal íbúa að ríkur vilji er til þess að þessi tvö svæði séu betur tengd, svo úbúar hinna stóru hvefa allt um kring fái þeirra enn betur notið. Í því felast mikil lífsgæði fyrir íbúana. Safnið hefur átt í afar góðu samstarfi við skipulagssvið hvað þetta varðar.

Á Landnámssýningunni var opnuð tímabundin sýning í samstarfi við Árnastofnun á handritunum sem tengjast landnáminu í Reykjavík, miklir dýrgripir sem kölluðu á mikla uppfærslu öryggismála.

Samþykkt var í borgarráði að kaupa elsta húsið í Kvosinni, Aðalstræti 10 og setja þar upp sýningu á vegum Borgarsögusafns, sem tengist Landnámssýningunni. Þetta er gríðarlega dýmætt verkefni; elsta húsið í hjarta borgarinnar, hvorki meira né minni og skiptir okkur öll gríðarlegu máli, Reykvíkinga, alla landsmenn og gesti okkar. Unnið er að gerð þeirrar sýningar, en núna í maí verður þetta merka hús opnað almenningi, sem safn og sýningahús með 3 nýjum sýningum á vegum Borgarsögusafns. Þegar húsið verður komið í gagnið og orðin ein heild með Landnámssýningunni, verður fjallað um sögu Reykjavíkur allt frá Landnámi og fram á 20. öld. Segja má að þar verði komið hið eiginlega Borgarsögusafn. En sýningin er ekki bara bundin við það sem sjá má innandyra í þessu ágæta húsnæði heldur má segja að nærumhverfið sé einnig sögusviðið; fornleifastaðir á Alþingisreit og Lækjargötu, Víkurgarður, Grjótaþorp og hugsanlega má tengja Gröndalshúsið á einhvern hátt við starfsemina. Í gömlu Kvosinni verður þannig sögu og menningarminjum gert hátt undir höfði. Ríkur skilningur er á þessu hjá borgaryfirvöldum; hvati, stuðningur og metnaður. M.a. var samþykkt að fara í sérstaka rannsókn með könnunarskurðum í Skólabrú, að tilstuðlan borgaryfirvalda, þar sem verið var að kanna hvort þar væri að finna óhreyfðar landnámsminjar. Svo var þó ekki, enda allt raskað undir götunni, en rannsóknin var engu að síður mikils virði.

Borgarráð samþykkti að umhverfis- og skipulagssvið, ásamt Borgarsögusafni færi í samstarf við Minjastofnum Íslands og efndu til hugmyndasamkeppni um framtíðar nýtingu og yfirbragð Víkurgarðs. Sú vinna er í gangi og væntanlega næst góðu sátt um þenna merka sögustað.

Borgin lagði til fjármagn, í tengslum við íbúakosningu í Betra hverfi, til að bæta umhverfið við grásleppuskúrana við Ægissíðu og var það unnið með Borgarsögusafni. Komu þá í ljós fornleifar og var lokið við rannsókn, lögum samkvæmt á svæðinu, sem hafa gefið okkur enn betri mynd á mannvist á þessu svæði.

Búið er að byggja við Grófarhúsið, Tryggvagötu 15, þar sem Borgarbókasafnið er til húsa, ásamt Ljósmyndasafni Reykjavíkur. Með þeirri viðbyggingu við Grófarhús gefst loks færi á að skapa Ljósmyndasafninu verðugan sýningavettvang á jarðhæð, enda má segja að núverandi sýningarrými sé þegar orðið of lítið og hefur þetta takmark verið á döfinni í raun allt frá því að Ljósmyndsafnið flutti inn í Grófarhús árið 2000. Þá var farið í sérstakar umbætur í fyrra til að bæta geymsluaðstöðu Ljósmyndasafnsins á 6. hæð Grófarhúss og segja má að aðstaðan þar sé nú harla góð.

Í Viðey hefur verið hlúð að menningarminjum. Ástand elstu húsa borgarinnar sem þar standa er mjög gott og hefur viðhald verið jafnt og þétt. Þá er búið að bæta aðstöðu gesta úti í eyju, í sérstöku átaki um umbætur á vinsælum ferðamannastöðum, en einnig fékkst í það verkefni styrkur í sjóði Ferðamálastofu.

Auka fjárveiting var sett til þess að hækka greiðslur til myndlistarfólks sem sýnir á Listasafni Reykjavíkur. Samtök myndlistarmanna, SÍM, fóru af stað með átakið, Við greiðum Myndlistarmönnum og í kjölfarið var tekið mikilvægt skref hjá Reykjavíkurborg og greiðslur auknar til Myndlistarfólks sem sýnir á Listasafni Reykjavíkur.

Auka fjárveiting var sett í varðveislu útilistaverka í borginni enda mæðir á þeim í íslensku veðurfari. Þar á meðal til þess að laga listaverkið Fyssu eftir Rúrí sem staðsett er í Grasagarðinum.

Auka fjárveiting til kaupa Listasafnsins á Íslandsvörðunni eftir Jóhann Eyfells við Sæbrautina.

Endurbætur á Ásmundarsafni liggja fyrir.

Listasafn Reykjavíkur hefur umsjón með listaverkasamkeppni í Vogabyggð og stendur að baki samkeppninni þar sem lögð er áhersla á að listaverk verði hluti af heildarhönnun almenningsrýma í hverfinu einkum á svæðum sem skilgreind eru sem þemavellir og andrými.

Listasafn Reykjavíkur fékk nýtt útlit og unnið hefur verið ötullega að því að styrkja ímynd þess.

Borgin gerði nýjan samning við Nýlistasafnið og jók framlög í ljósi umfangs og rekstrarkostnaðar en Nýlistasafnið ásamt Kling og Bang er komið í hina nýju myndlistarmiðstöð Marshallhúsið.

Hvað þarf að bæta í safnamálum í þínu sveitarfélagi?

Eins og gefur að skilja hefur afar mikið verk verið unnið á síðustu tveimur kjörtímabilum. Það má huga að því hvernig megi gera málefni safna og sýninga enn aðgengilegri fyrir íbúum og gestum borgarinnar. Jafnframt verður að huga að rafrænni skráningu betur en meginatriðin í safnamálum hafa verið í afar góðum farvegi. Huga þarf að auknu rými en Listasafn Reykjavíkur heldur utan um mikið safn listaverka og þarf aukið rými til geymslu og varðveislu og sömuleiðis aukið athafnarými innan húss og umsýslu með safnkostinn. Líkt og kemur fram hér á undan um Borgarsögusafn þarf að huga áfram að auknu húsnæði fyrir varðveislu menningarverðmæta. Söfnin eru í stanslausri þróun og starfsfólk þarf að fá tækifæri til að auka við faglega þekkingu sína og miðla henni áfram. Vinna þarf áfram að stefnumörkun á fjölbreyttum sviðum innan safnanna, líkt og á sviði þjónustu og rannsókna og hlúa áfram að þeim mikla og góða mannauði sem starfar innan safnanna.

Viðbrögð við ályktun (send fyrir fund):

Samfylkingin í Reykjavík tekur undir ályktun stjórnar Félags íslenskra safna- og safnamanna (FÍSOS), Félags íslenskra safnafræðinga (FÍS) og fagdeildar safnamanna innan Fræðagarðs um framtíð safna á Íslandi. Framlög til safna í borginni hafa farið hækkandi á kjörtímabiinu og hvetur borgin ríki og önnur sveitarfélög til að fylgja fordæmi Reykjavíkurborgar við fjármögnun íslenskra safna. Söfn gegna mikilvægu hlutverki fyrir heimamenn og gesti. Reykjavíkurborg vill því efla áfram safnastarf á Íslandi í samstarfi við þau félög sem standa fyrir fundinum.

Fyrir hönd Samfyklingarinnar í Reykjavík mæta Hjálmar Sveinsson og Margrét M. Norðdahl.

Framtíð safna á Íslandi: Eru söfn á stefnuskrá flokka? – Sjálfstæðisflokkurinn í Garðabæ

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

Eftirfarandi svar barst frá Sjálfstæðisflokknum í Garðabæ:

“Spurningar Félags íslenskra safna- og safnmanna (FÍSOS), Félags íslenskra safnafræðinga (FÍS) og fagdeild safnmanna innan Fræðagarðs, sendar 6. apríl 2018. Þar sem félögin óska eftir stefnu og afstöðu framboðsins til meðal annars eftirfarandi spurninga sem varða safnamál:

  1. Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Er í vinnslu

            Hvar má nálgast stefnuna? Þegar að kemur: www.gardar.is

  1. Hvaða hlutverki gegna söfnin í þínu sveitarfélagi?
  • Hönnunarsafn Íslands
  • Bókasafn Garðabæjar, almenningsbókasafn, rekið í tveimur starfsstöðvum:

Meginsafnkostur er á Garðatorgi, hluti í Álftanesskóla (samsteypusafn; alm.bókasafn

og skólasafn).

  • Skólabókasöfn.
  • Fornleifagarðurinn Hofsstöðum
  1. Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?
  • Menningarhúsið, þarfagreining og greining varðandi staðarval
  1. Hvað hefur áunnist í safnamálum í sveitarfélaginu á síðastliðnum árum?
  • Hönnunarsafnið – sterkara, stefnumótun
  • Bókasafnið –umfang eykst, gestum fjölgar
  1. Hvað þarf að bæta í safnamálum í þínu sveitarfélagi?
  • Menningarhús – Undirbúningur
  • Stækka og bæta húsakost Bókasafns Garðabæjar sem er ein stærsta menningarstofnun bæjarins og gegnir þar mikilvægu hlutverki
  • Bæta húsakost Hönnunarsafns Íslands og vinna að því í samvinnu við eigendur hússins að bæta ásýnd safnsins við Garðatorg
  • Ljúka við hugmyndavinnu og hönnun vegna Hofsstaðagarðs. Í kjölfarið verði ráðist í endurbætur á gagnvirku kynningarefni þar sem sögu staðarins og ábúendum í gegnum tíðina eru gerð skil.
  • Listaverk í eigu Garðabæjar, rafræn skráning og opna bæjarbúum aðgang.”

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi? Eru söfn á stefnuskrá flokka? – Vinstrihreyfingin – grænt framboð

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál.

Eftirfarandi svar barst frá Vinstrihreyfingunni – grænt framboð á höfuðborgarsvæðinu:

“Stjórnir Félags íslenskra safna- og safnmanna (FÍSOS), Félags íslenskra safnafræðinga (FÍS) og fagdeild safnmanna innan Fræðagarðs hafa sent frambjóðendum til sveitarstjórna árið 2018 spurningar varðandi afstöðuna til málefna safna. Frambjóðendur Vinstrihreyfingarinnar – græns framboðs í Reykjavík og Kópavogi hafa kosið að senda sameiginlegt svar þar sem að sumu leyti er um að ræða almenna stefnu flokksins en að öðru leyti sérstök svör er varðar sérstöðu hvors sveitarfélags um sig.

Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?
Vinstrihreyfingin – grænt framboð hefur sett sér metnaðarfulla mennta- og menningarstefnu, sem nálgast má hér: http://vg.is/menntastefna/
Í henni er nokkuð vikið að safnamálum og þá einkum mikilvægi þess að hið opinbera styðji af krafti við safnastarfsemi. Stefna flokksins er að stefna að gjaldfrjálsu aðgengi almennings að menningarminjasöfnum og öðrum söfnum sem rekin eru af ríki og sveitarfélögum. Jafnframt verði þeim gert kleift að sinna hlutverki sínu varðandi menntun, rannsóknir og nýsköpun. Áréttað er í stefnunni að opinber söfn skuli greiða listamönnum fyrir vinnu sína.

Vinstrihreyfingin – grænt framboð á jafnframt aðild að ríkisstjórn um þessar mundir. Í stjórnarsáttmála ríkisstjórnar Katrínar Jakobsdóttur er sérstaklega tekið fram að á kjörtímabilinu skuli hugað að því að styrkja rekstur höfuðsafnanna þriggja. Þar á meðal verður Náttúruminjasafn Íslands styrkt til að opna eigin sýningu og gert skal ráð fyrir hönnun varanlegs safnhúsnæðis í fjármálaáætlun til fimm ára. Jafnframt verður ráðist í byggingu Húss íslenskra fræða, sem mun meðal annars hafa að geyma glæsilega en langþráða handritasýningu.
Reykjavík:
Á vettvangi borgarmála, er stefna Vinstrihreyfingarinnar – græns framboðs að standa vörð um rekstur hefðbundinna menningarstofnanna Reykjavíkurborgar, svo sem Borgarsögusafn Reykjavíkur, Listasafns Reykjavíkur og Borgarbókasafns. Útibú Borgarbókasafns í einstökum hverfum eru mikilvægar menningarmiðstöðvar og uppspretta fjölbreyttrar lista- og menningarstarfsemi sem ber að styrkja.
Kópavogur:
Í Kópavogi er stefna Vinstrihreyfingarinnar – græns framboðs að standa vörð um rekstur þeirra menningarstofnana sem þar eru þegar reknar og efla þær eftir því sem er ástæða og svigrúm til. Tryggja þarf nægilegt rekstrarfé til að söfn og menningarhús geti boðið gjaldfrjálsan aðgang að grunnsýningum.
Aukin kraftur í starfsemi menningarstofnana felst fyrst og fremst í frumkvæði starfsmanna og stjórnenda og stjórnmálamönnum ber alltaf að mæta því með skilningi og virðingu og þeim stuðningi sem þeir geta veitt.

Hvaða hlutverki gegna söfnin í þínu sveitarfélagi?
Vinstrihreyfingin – grænt framboð leggur sérstaka áherslu á aðgengi allra þjóðfélagshópa að menningarstarfsemi. Þar er ekki aðeins átt við aðgengi í skilningi ferlimála, heldur að almenningur eigi kost á að nýta sér söfn óháð efnahag, uppruna og aðgengi. Þá er ekki síður mikilvægt að börn læri snemma að tileinka sér söfn, sem verður best gert með því að auðvelda skólum afnot af söfnunum. Starfsemi safna hefur verið að þróast til aukinnar samfélagslegrar gagnvirkni og þá þróun ber að styðja.

Starfsemi safnanna er þó ekki bundin innan veggja þeirra, heldur hafa þau lykilhlutverki að gegna við að miðla list og sögu í almannarýminu, hvort sem er með upplýsingaskiltum, útilistaverkum eða eftir öðrum leiðum. Sumt hefur vel vel get á þessum sviðum í Reykjavík og Kópavogi, svo sem með upplýsingaskiltum um sögu og náttúru, en meðal kosningastefnumála Vinstrihreyfingarinnar – græns framboðs er að leggja enn frekar rækt við þennan þátt, t.d. með fjölgun útilistaverka, þar með talið veggskreytinga og með söguskiltum sem miðla fróðleik til borgarbúa í nærumhverfi þeirra. Það er víðar saga og menning en í Kvosinni.
Reykjavík
Reykjavík er miðstöð höfuðsafnanna þriggja, en að auki er þar að finna fjölda smærri safna sem rekin eru af sveitarfélaginu, áhugamannafélögum eða einstaklingum. Þau hafa geysimiklu hlutverki að gegna, jafnt sem stoðtæki fyrir skólakerfið, sem afþreying fyrir ferðamenn og athvarf fyrir heimamenn til að auðga andann.
Kópavogsbær
Bókasöfn, bæði skólabókasöfn og almenningsbókasöfn, eru meðal grunnstoða menntunar og menningar í hverju sveitarfélagi auk þess sem þau gegna mikilvægu félagslegu og lýðræðislegu hlutverki. Aðgangur að þeim þarf að vera greiður og þau þurfa að búa við húsnæði og rekstrarfé sem tryggir að þau geti sinnt þessum hlutverkum.
Gerðarsafn gegnir mikilvægu hlutverki í bænum, bæði með öflugu og framsæknu sýningarhaldi og þeim safnkosti sem komið hefur verið upp, ekki síst verkum listamanna sem hafa búið og starfað í bænum, sem eðlilegt er að lögð sé megináhersla á, en einnig verkum annarra listamanna.

Í þessu sambandi er líka vert að minnast á mikilvægi þess að Kópavogsbær standi með þeim listamönnum á öllum sviðum sem búa og starfa í bænum og minningu þeirra sem látnir eru. Þar hefur margt verið vel gert sem mikilvægt er að halda við og efla enn frekar.
Náttúrustofa Kópavogs gegnir samkvæmt stofnskrá sinni fjölbreyttu hlutverki varðandi rannsóknir, söfnun, skráningu og varðveislu, fræðslu, ráðgjöf um landnýtingu, skipulagsmál, náttúrvernd og umhverfismál. Mikilvægt er að henni sé gert kleift að sinna þessum verkefnum. Árið 2016 heimsóttu safnið tæplega 14.000 gestir sem segir sitt um mikilvægi þess þótt önnur verkefni skuli síst vanmetin.
Starfsemi Héraðskjalasafnins er að sjálfsögðu mjög mikilvæg til að halda utan um skjöl og heimildir varðandi bæinn, en þar fer líka fram mikilvæg fræðslustarfsemi sem ástæða er til að styðja við. Starfsemi slíkra skjalasafna felst ekki bara í að safna og flokka skjöl heldur líka gera þau aðgengileg og stuðla að rannsókn þeirra. Þetta má aldrei gleymast við úthlutun fjár til þeirra.

• Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?
Söfn eru ekki aðeins mikilvæg fyrir sjálfsmynd þjóðarinnar, heldur eru þau aðdráttarafl fyrir stærstu útflutningsgrein landsins, ferðaþjónustuna. Ekki skal lasta þær margvíslegu og metnaðarfullu sýningar sem einkaaðilar hafa sett upp á liðnum árum, ekki hvað síst til að fanga hinn stóra hóp erlendra ferðamanna, en mikilvægt er þó að missa ekki sjónar á faglegum kröfum. Safnastarfsemi þarf að reka af innsýn og þekkingu og hefur Safnaráð Íslands þar mikilvægu hlutverki að gegna.
Reykjavík
Fornleifafundir í miðborg Reykjavíkur á liðnum árum fela í sér spennandi tækifæri og miklar áskoranir fyrir borgaryfirvöld. Ljóst er að ferðamenn hafa mikinn áhuga á að fræðast um upphaf byggðar í Reykjavík og kynna sér fornminjar af þessu tagi. Leita þarf leiða til að samrýma vernd og miðlun þeirra hinum þeirri miklu uppbyggingu sem nú um stundir á sér stað í miðborginni.
Brýnt er að dreifa ferðamönnum betur um borgina en nú er, enda hefur Reykjavík upp á mun fleira að bjóða en gamla miðbæinn. Söfn borgarinnar hafa þar mikilvægu hlutverki að gegna. Má í því sambandi nefna Viðeyjarstofu, sem heyrir undir Borgarsögusafn Reykjavíkur. Viðey er falin perla sem alltof fáir ferðamenn heimsækja og má raunar sömu sögu segja um heimamenn. Eins mætti gera miklu meira úr stríðsminjum þeim sem varðveittar eru í borgarlandinu eða sögu jarðvarmans og Þvottalauganna í Laugardal.

Kópavogur
Varðandi tengsl ferðaþjónustu og safna í Kópavogi er eðlilegt að líta fyrst og fremst til Gerðarsafns og Náttúrustofu Kópavogs. Bæði söfnin er mjög vel staðsett á höfuðborgarsvæðinu og standa við helstu umferðaræðina þvert á svæðið. Þau hljóta líka að koma inn í myndina við frekari þróun Hamraborgarinnar og svæðisins norðan hennar sem gæti orðið styrkur fyrir ferðaþjónustu í Kópavogi. Eðlilegt er að skoða þetta í samhengi við starfsemi Markaðstofu Kópavogs og samstarf sveitarfélaga á höfuðborgarsvæðinu undir vörumerkinu Reykjavik Loves.

Hvað hefur áunnist í safnamálum í sveitarfélaginu á síðastliðnum árum?
Reykjavík
Sameining Árbæjarsafns, Ljósmyndasafns Reykjavíkur, Landnámssýningar í Aðalstræti, Viðey og Sjóminjasafnsins í Reykjavík undir merkjum Borgarsögusafns Reykjavíkur var heilladrjúg og gaf hinni nýju stofnun slagkraft til að takast á við ný verkefni. Að frumkvæði Reykjavíkurborgar í samstarfi við ríkisvaldið hillir loks undir að Náttúruminjasafn Íslands geti opnað sýningu á ný í Perlunni. Vonandi verður það kveikjan að varanlegri lausn á hörmulegri áratuga hrakningasögu þessa lykilsafns.
Kópavogur
Eftir mikla stækkun Kópavogsbæjar á undanförnum tveim til þrem áratugum var sett upp útibú frá Bókasafni Kópavogs, Lindasafn.
Eftir að Tónlistarsafni Íslands var komið á fót af eljusemi fáeinna áhugamanna hafði það um skeið aðsetur í Kópavogi en hefur nú fengið inni Þjóðarbókhlöðu en nýtur enn styrks frá Kópavogs. Það hlýtur að vera metnaðarmál fyrir Kópavogsbæ að halda þeim styrk við.
Gerðarsafn og Náttúrustofa hafa verið rekin af metnaði en mikilvægt er að þar verði ekki slakað á.

• Hvað þarf að bæta í safnamálum í þínu sveitarfélagi?
Reykjavík
Í fullkomnum heimi væru söfn landsmanna stærri, öflugari og fleiri. Dæmi er um söfn á hrakhólum, svo sem Leikminjasafn Íslands. Mikið væri einnig til vinnandi að Reykvíkingar eignuðust kröftugt fræðslu- og tilraunasetur í raunvísindum ætlað skólabörnum. Eins vantar safn eða söfn sem sinna ýmsum þáttum tæknisögu tuttugustu aldar, svo sem tölvutækninni.
Það er þó varasamt að fjölga í sífellu nýjum söfnum, enda er smæð rekstrareininganna eitt af höfuðvandamálum íslensks safnreksturs. Brýnt er því að leitast við að styrkja frekar þær einingar sem fyrir eru. Það er einnig plagsiður hér á landi að hlaupa til og stofna söfn í þeim megintilgangi að finna gömlum og sögufrægum byggingum hlutverk. Húsaverndun er góð og brýn, en er ekki endilega besta átyllan til safnrekstrar. Þá er mikilvægt að gleyma ekki þeim stóra hluta safnrekstursins sem ekki er sýnilegur almenningi, s.s. skrifstofur, verkstæði og geymslur. Ljóst er að gera þarf bragarbót í geymslumálum margra safna í Reykjavík líkt og víðar.
Kópavogur
Frá því útbúi Bókasafns Kópavogs í Lindunum var komið á fót hefur bærinn stækkað enn til austurs. Full ástæða er til að skoða hvort ástæða sé til að styrkja enn frekar starfsemi bókasafns/bókasafna eða aðra bókasafnaþjónustu í þessum nýrri hluta bæjarins. Það má líka velta fyrir sér hvort tímabært sé að að kanna þörf og möguleika á einhvers konar menningarmiðstöð í efri byggðum Kópavogs. Það er hinsvegar varhugavert að stjórnmálaflokkar skreyti sig með einhverjum loforðum um ákveðnar aðgerðir í þessum efnum, þetta þarf að skoða með opnum huga í samstarfi við starfsfólk og annað fagfólk í þessum efnum.
Í ársskýrslu Náttúrufræðistofu Kópavogs frá 2015 kemur í ljós að skólar í Kópavogi, sem eru í næsta nágrenni stofunnar, eru tíðari gestir en þeir sem eiga um lengri veg að fara. Ferðakostnaður og/eða ferðatími virðist því hindra
að þjónusta Náttúrufræðistofunnar sé nýtt. Ekki kemur fram í nýrri skýrslum hvort breyting hafi orðið á þessu, en sé svo ekki er mikilvægt að bregast við því.
Mikilvægast er að hlúa sem best að þeim söfnum sem þegar eru í Kópavogi en fara hægar í sakirnar með fjölgun þeirra. Þó er sjálfsagt að horfa til slíks með opnum huga. Framlag Kópavogsbæjar getur líka falist í styrkjum til safna eins Tónlistarsafns Íslands.”

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi: Eru söfn á stefnuskrá flokka? – Garðabæjarlistinn

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál. Eftirfarandi svör bárust frá Garðabæjarlistanum:

  • Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?

“Í Garðabæ eru bókasöfn (Garðabæ og Álftanesi), Hönnunarsafn Íslands, Krókur á Garðaholti og Minjagarðurinn við Hofsstaði. Hér má sjá yfirlit yfir söfn:

http://www.gardabaer.is/mannlif/menning/sofn/

við ætlum að styrkja núverandi söfn og auka aðsókn að þeim. Þetta höfum við þegar gert með að halda tvo helstu viðburði okkar í Hönnunarsafninu og fengið þangað fólk sem ekki vissi af þessu frábæra safni. Garðabær hefur til þessa gert of lítið til að kynna og markaðssetja söfnin sín. Þessu viljum við breyta.

við ætlum að nýta í auknum mæli þau tækifæri sem þegar eru í Garðabæ til að vekja áhuga á sögu og menningu almennt. Þar er nátttúra og saga í fyrirrúmi. Nefna má Wegener stöpulinn á Arnarnesi sem í jarðsögulegu samhengi er með merkustu minjum.

við tökum fullan þátt í þeirri umræðu sem þegar hefur farið af stað með byggingu fjölnota menningar- og fræðamiðstöðvar. Þar teljum við mikilvægt að íbúar fái tækifæri til að tjá skoðun sína á starfsemi slíkrar miðstöðvar.

Við höfum lagt sérstaka áherslu á sköpunarhús í Garðabæ til að virkja hugmyndir og kraft skapandi greina.

Almenn stefna Garðabæjarlistans er að virkja íbúalýðræði og valdefla íbúa á þann hátt að þeir komi í meira mæli að ákvörðunum um valkvæð verkefni sveitarfélagsins. Það á að vera markmið hverrar bæjarstjórnar að íbúar láti sig varða um málefni nærsamfélagsins sem þeir tilheyra. Valdefling íbúa á að vera leiðarljós þeirra sem hið pólitíska vald hafa. Með eflingu valds, sem þýðir að færa hið raunverulega vald meira yfir til íbúanna sjálfra má ná fram því besta sem völ er á hverju sinni fyrir samfélagið í heild. Á sama tíma er nauðsynlegt að stefna að fullu gagnsæi í ákvarðanatöku, framkvæmdum og öðrum upplýsingum sem nauðsynlegar eru til þess að bæjarbúar geti mótað sér upplýsta skoðun á málefnum og verkefnum.

Málefnaáherslur Garðabæjarlistans má finna hér: https://www.gardabaejarlistinn.is/

Okkur má einnig finna á

Facebook: https://www.facebook.com/gardabaejarlistinn/

Instagram: http://instagram.com/gbrlistinn

Twitter: https://twitter.com/gbrlistinn

  • Hvaða hlutverki gegna söfnin í þínu sveitarfélagi?

Söfn í Garðabæ vantar aukið hlutverk. Þau hafa verið sett á laggir án mikillar kynningar en eiga möguleika á ríkara hlutverki í samfélaginu.

  • Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?

Garðabær hefur hingað til ekki mótað sér nægjanlega skýra stefnu í ferðamálum. Þetta á við söfn sem aðra þjónustu við ferðamenn. Minjar í Garðabæ eru mjög áhugaverðar og ættu að vera aðdráttarafl ferðamanna og þar með annarrar þjónustu við ferðamenn. Með betri kynningu á minjum og sögu ætti að skapast næg eftirspurn til reksturs fyrirhugaðs fjölnota menningar- og fræðamiðstöðvar.

  • Hvað hefur áunnist í safnamálum í sveitarfélaginu á síðastliðnum árum?

Allt of lítið

  • Hvað þarf að bæta í safnamálum í þínu sveitarfélagi?

Fara þarf í allsherjar stefnumótun þar sem búin er til framtíðarsýn á hlutverk safna og annarrar menningarstarfsemi.”

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi: Eru söfn á stefnuskrá flokka? – Miðflokkurinn í Reykjavík.

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

◾Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?

◾Hvaða hlutverki gegna söfnin í þínu sveitarfélagi?

◾Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?

◾Hvað hefur áunnist í safnamálum í sveitarfélaginu á síðastliðnum árum?

◾Hvað þarf að bæta í safnamálum í sveitarfélaginu?

Eftirfarandi svar barst frá Vigdísi Hauksdóttir, oddvita Miðflokksins í Reykjavík:

“Ég skrifa hér okkar sýn á safnamál í Reykjavík frekar en að svara einstökum spurningum.

Miðflokkurinn í Reykjavík leggur áherslu á safnamál og teljum við að söfnum í eigu borgarinnar séu býsna öflug og að þeim hafi verið sinnt vel af stjórnvöldum

Söfnin í Reykjavík skipta gríðarlega miklu máli fyrir borgina sem höfuðborg því hún ber ákveðnar skyldur sem slík. Miðflokkurinn styður þá ákvörðun sem tekin var að setja menningar og ferðamál undir sama hatt. Fulltrúar flokksins hafa þegar farið og heimsótt Menningar- og ferðamálaráð og kynnt sér starfsemi þess.

Að svo komnu máli getur Miðflokkurinn ekki haft skoðun á því hvað þarf að bæta í safnamálum þar sem hann er nýr stjórnmálaflokkur en lýsir yfir miklum vilja að hitta þá er að þessum fundi standa til að fá ráðleggingar.

Þess má geta að formaður flokksins, Sigmundur Davíð Gunnlaugsson beitti sér mjög í safnamálum þegar hann var forsætisráðherra

Með bestu kveðju, Vigdís Hauksdóttir.”

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi: Eru söfn á stefnuskrá flokka? – Framsóknarflokkurinn í Reykjavík

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

◾Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?

◾Hvaða hlutverki gegna söfnin í þínu sveitarfélagi?

◾Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?

◾Hvað hefur áunnist í safnamálum í sveitarfélaginu á síðastliðnum árum?

◾Hvað þarf að bæta í safnamálum í sveitarfélaginu?

Eftirfarandi svar barst frá Framsóknarflokknum í Reykjavík:

  • Að fara að safnalögum og gera allt sem í okkar valdi stendur til þess að gera vel í þessum mikilvæga málaflokki.
  • Við höfum ekki ennþá gefið út okkar stefnuskrá en stefnuskrá Framsóknarflokksins má nálgast á framsokn.is
  • Þau varðveita menningu, veita fræðslu, eru mikilvæg í ferðamannaiðnaði og margt fleira.
  • Þau tengsl eru sterk því ferðamenn heimsækja söfn.
  • Söfnum hefur fjölgað sem er mjög jákvætt.
  • Auka samvinnu á milli safna og borgaryfirvalda

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi: Eru söfn á stefnuskrá flokka? – Íslenska þjóðfylkingin

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

  • Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?
  • Hvaða hlutverki gegna söfnin í þínu sveitarfélagi?
  • Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?
  • Hvað hefur áunnist í safnamálum í sveitarfélaginu á síðastliðnum árum?
  • Hvað þarf að bæta í safnamálum í sveitarfélaginu?

Eftirfarandi svar barst frá Íslensku þjóðfylkingunni:

“Það er grundvöllur hverra þjóðar sem og sveitafélaga að styðja við menningu og sögu í sínu sveitarfélagi.  Sá stuðningur er og verður alltaf markmið Íslensku þjóðfylkingarinnar, enda flokkur sem hefur verið stofnaður um verndun Íslenskra róta meðal annars.

F.h. Íslensku þjóðfylkingarinnar,

Guðmundur Karl Þorleifsson. formaður Íslensku þjóðfylkingarinnar.”

FÍSOS, FÍS og fagdeild safnafólks í Fræðagarði þakkar góð og skýr svör.

Framtíð safna á Íslandi: Eru söfn á stefnuskrá flokka? – Upptaka frá fundi 25.apríl 2018

Þann 25. apríl 2018 var haldinn umræðufundur með frambjóðendum til sveitarstjórnarkosninga á höfuðborgarsvæðinu.  FÍSOS, FÍS og fagdeild safnafólks í Fræðagarði boðuðu til fundarins.

Félögin óskuðu eftir stefnu og afstöðu framboðanna til m.a. eftirfarandi spurninga er varða safnamál:

  • Hver er stefna þíns flokks/framboðs í safnamálum og hverjar eru helstu áherslur til næstu fjögurra ára? Hvar má nálgast stefnuna?
  • Hvaða hlutverki gegna söfnin í þínu sveitarfélagi?
  • Hvernig sér þinn flokkur/framboð fyrir sér tengsl ferðaþjónustu og safna í sveitarfélaginu?
  • Hvað hefur áunnist í safnamálum í sveitarfélaginu á síðastliðnum árum?
  • Hvað þarf að bæta í safnamálum í sveitarfélaginu?

Sum framboðanna sendu inn skrifleg svör við spurningum og eru þau birt hér sem einstök frétt frá þeim sem skiluðu inn svörum.

Hér má sjá upptöku af fundinum.

 

Tilnefningar til íslensku safnaverðlaunanna 2018

Tilkynnt var um tilnefningar til Safnaverðlaunanna 2018 í tilefni af Alþjóðlega safnadeginum á Íslandi, þann 17. maí í útvarpsþættinum Víðsjá á Rás 1 Ríkisútvarpsins. Íslensku safnaverðlaunin er viðurkenning veitt annað hvert ár íslensku safni fyrir framúrskarandi starfsemi. Forseti Íslands,  Guðni Th. Jóhannesson,  afhendir safnaverðlaunin 2018 við hátíðlega athöfn þann 5. júní nk. á Bessastöðum.

TILNEFNINGAR DÓMNEFNDAR Í STAFRÓFSRÖÐ:

Grasagarður Reykjavíkur
Grasagarður Reykjavíkur er lifandi safn undir berum himni. Þar er varðveittur stór hluti af
íslensku háplöntuflórunni ásamt fjölbreyttu úrvali erlendra plantna. Heildarfjöldi safngripa er um 5.000, skipt í átta safndeildir.

Hlutverk Grasagarðsins er að varðveita og skrá plöntur til fræðslu, rannsókna og yndisauka. Plöntusöfnin gefa hugmynd um fjölbreytni gróðurs í tempraða beltinu nyrðra. Meginhluti tegundanna kemur úr frælistum erlendra grasagarða og fer ræktunin fer fram í sáningarhúsi, uppeldisgróðurhúsum, vermireitum og uppeldisbeðum.

Grasagarðurinn stendur fyrir öflugri fræðslustarfsemi fyrir almenning og skólahópa árið um
kring, enda er fræðsla eitt af meginhlutverkum hans. Markmið fræðslunnar er að nýta hin
margvíslegu plöntusöfn til fræðslu um umhverfið, garðyrkju, grasafræði, dýralíf,
garðmenningu og grasnytjar, sem og til eflingar útiveru og lýðheilsu. Auk fræðslusamstarfs
við leik- og grunnskóla borgarinnar hefur Grasagarðurinn verið í samstarfi við m.a.
Kvikmyndasafn Íslands, Garðyrkjufélag Reykjavíkur og Listaháskóla Íslands. Ýmis
samstarfsverkefni á sviði rannsókna og söfnunar hafa ennfremur verið unnin á undanförnum árum í Grasagarðinum í samstarfi við Náttúrufræðistofnun Íslands, Lystigarð Akureyrar, Norræna genabankann o.fl.

Grasagarðurinn starfar samkvæmt íslensku safnalögunum og er viðurkennt safn. Sömuleiðis er unnið eftir lögum um náttúruvernd, öðrum íslenskum lögum og reglugerðum er varða starfsemina og alþjóðlegum samþykktum um líffræðilegan fjölbreytileika.

Mat valnefndar er að Grasagarður Reykjavíkur gefi ómetanlega innsýn í stórmerkilega flóru
Íslands og sé einstakur meðal safna á Íslandi. Garðurinn er lifandi safn undir berum himni,
með lifandi safngripum. Fræðsla er mikilvæg stoð í starfseminni, ásamt rannsóknum, þar
sem áhersla er lögð á fjölbreytt samstarf.

Listasafn Árnesinga
Listasafn Árnesinga býður upp á fjölbreyttar og metnaðarfullar sýningar sem veita gott
aðgengi að myndlistararfi þeim sem það varðveitir. Safnið kynnir einstaka listamenn á einkaog samsýningum og hefur verið í samstarfi við önnur söfn um sýningar um árabil. Útgáfur safnsins eru til fyrirmyndar þar sem gefin er út vönduð sýningarskrá í tengslum við hverja sýningu, sem er mikilvæg heimild um starf og sýningar safnsins.

Safnið heldur úti markvissu fræðslustarfi þar sem unnið er með mismunandi skólastigum,
listamönnum, fræðimönnum og almenningi. Námskeið og smiðjur eru haldnar reglulega fyrir almenning þar sem gefst kostur á að vinna með mismunandi miðla í tengslum við sýningar safnsins.

Listasafn Árnesinga var á sínum tíma fyrsta listasafnið utan höfuðborgarsvæðisins sem opið var almenningi og hefur sýnt sig og sannað sem öflugt og framsækið listasafn.

Mat valnefndar er að sú áhersla í sýningarhaldi sem fylgir meginmarkmiði Listasafns
Árnesinga um að efla áhuga, þekkingu og skilning almennings á sjónlistum sé til fyrirmyndar. Safnið beitir árangursríkum aðferðum í fræðslu með umræðum og uppákomum, sem bera vitni um metnað, fagmennsku og nýsköpun.

Varðveislu- og rannsóknasetur Þjóðminjasafns Íslands
Þjóðminjasafn Íslands er höfuðsafn á sviði menningarminja og leiðandi á sínu sviði. Þar er
varðveittur mikilvægur minjaauður þjóðarinnar, sem er í senn kveikja þekkingar og
nýsköpunar.

Undanfarin ár hefur Þjóðminjasafn Íslands tekið framfaraskref í varðveislumálum sem eru öðrum söfnum til fyrirmyndar. Rannsókna- og varðveislusvið safnsins hefur aukið þekkingu safnmanna á fyrirbyggjandi þáttum forvörslu og mikilvægi réttrar meðhöndlunar safngripa með útgáfu Handbókar um varðveislu safnkosts, sem aðgengileg er á vefsíðu safnsins. Góð varðveisla þjóðminja er forsenda þess að framtíðin þekki þann auð og geti nýtt sér hann.

Árið 2016 var tekið í notkun nýtt varðveislu- og rannsóknasetur Þjóðminjasafns Íslands á
Tjarnarvöllum 11 í Hafnarfirði. Húsnæðið var innréttað sérstaklega eftir þeim kröfum sem
sérfræðingar safnsins settu til þess að tryggja kjöraðstæður til varðveislu safngripa. Aðstaða til þess að sinna varðveislu er til fyrirmyndar; vinnuaðstaða fyrir móttöku gripa og skráningu ásamt vel útbúnu forvörsluverkstæði. Rými til rannsókna er stórbætt og fræðimönnum og nemendum er gefið færi á að nýta safnkostinn í verkefnum sínum. Varðveislu- og rannsóknasetrið styður mjög vel við markmið safnastefnu á sviði menningarminja þar sem aðstæður hafa verið skapaðar til að gera starfsfólki enn betur kleift að vinna faglega og á vandaðan hátt með safnkostinn um leið og rækt er lögð við starfsumhverfið til að styðja við markmið safnastarfsins.

Mat valnefndar er að varðveislu- og rannsóknasetur Þjóðminjasafns Íslands muni hafa
afgerandi áhrif á fagleg vinnubrögð starfsmanna safna um allt land. Með því er tónninn
gefinn fyrir framtíðarvarðveislu þjóðargersema.

Fréttatilkynning – Framtíð safna á Íslandi: Eru söfn á stefnuskrá framboða?

Sveitarstjórnarkosningar 2018 og söfnin í landinu

Undanfarnar vikur hafa stjórnir FÍS, félag íslenskra safnafræðinga og FÍSOS, ásamt fagdeild safnamanna innan fræðagarðs, unnið að ályktun um stöðu safna í sveitarfélögum á Íslandi í tilefni af sveitarstjórnarkosningum nú í vor. Ályktun verður send flokkunum þann 6. apríl og fréttatilkynning á fjölmiðla í kjölfarið.

Þann 25. apríl kl. 16.00 bjóða bréfritarar til fundar með fulltrúum framboðanna í Borgartúni 6, 3. hæð i Reykjavík.

Stjórnir félaganna leita til félagsmanna til að koma ályktuninni til sem flestra frambjóðanda. Þeir sem hafa áhuga að taka þátt í þessu mikilvæga verkefni sendið póst á stjorn@safnmenn.is.

Nú er lag kæru félagar að efla sýnileika safna og opna enn frekar á umræðuna um mikilvægi þeirra líkt og félagsmenn hafa rætt á farskólum félagsins undanfarin ár.



Fréttatilkynning – Framtíð safna á Íslandi: Eru söfn á stefnuskrá flokka?
Félag íslenskra safna- og safnmanna (FÍSOS), Félag íslenskra safnafræðinga (FÍS) og fagdeild safnmanna innan Fræðagarðs hvetur til umræðu meðal frambjóðenda til sveitarstjórnakosninga 2018 um stöðu safna landsins. Sveitarfélög landsins reka flest a.m.k eina stofnun sem fellur undir safnalög. Ábyrgð sveitarfélaganna er því rík, bæði er varðar rekstur safna og framtíðarsýn í málaflokknum.

Söfn eru mikilvægur þáttur í samfélagsgerðinni á Íslandi, innan menningar- og efnahagslífs. Árlega sækja þau rúmlega 1.000.000 gestir á landsvísu. Söfn landsins safna, rannsaka og miðla menningararfinum og varðveita hann til framtíðar.

Félagsmenn FÍSOS, FÍS og fagdeildar Fræðagarðs hafa metnað fyrir faglegu safnastarfi á Íslandi. Framtíðarskipulag safna er félagsmönnum efst í huga. Þess vegna óska félagsmenn framboð og flokka um stefnu er viðkemur málefnum safna í þeirra sveitarfélagi.

Félögin hafa í sameiningu sent ályktun til þeirra einstaklinga og stjórnmálaflokka sem bjóða fram krafta sína í komandi sveitarstjórnarkosningum.

Óskað er eftir viðbrögðum við ályktuninni og þeim spurningum sem þar eru settar fram.

Félögin bjóða fulltrúum flokkanna á umræðufund 25. apríl 2018 kl. 16.00 í Borgartúni 6, 3. hæð, þar sem málefni safna verða til umfjöllunar.Léttar veitingar í boði.

Opið bréf til Byggðarráðs Skagafjarðar frá Félagi íslenskra safna og safnmanna. 16.03.2018.


Mynd - Hér tekin eftir heimasíðu Byggðasafns Skagafirðinga

Opið bréf til Byggðarráðs Skagafjarðar

Reykjavík 16. mars 2018.

Efni: Staða Byggðasafns Skagfirðinga.

Stjórn Félags íslenskra safna og safnmanna lýsir yfir áhyggjum af stöðu Byggðasafns Skagfirðinga þar sem nú ríkir óvissa um aðbúnað starfsfólks og varðveislu safngripa. Starf Byggðasafns Skagfirðinga hefur verið blómlegt og til fyrirmyndar í íslensku safnastarfi um langt skeið og hlaut Íslensku safnaverðlaunin árið 2016.

Byggðasafnið hefur sterkar rætur í samfélaginu enda hafa íbúar þess falið safninu menningarverðmæti til varðveislu frá 1948. Að eiga og reka safn er ekki skammtímaverkefni. Að varðveita menningarminjar sem íbúar sveitafélagsins hafa falið safninu að varðveita er ekki léttvægt verkefni.

Stjórn Félags íslenskra safna og safnmanna skorar á eigendur Byggðasafns Skagfirðinga að setja faglegt safnastarf ekki í uppnám og tryggja viðunandi aðstöðu fyrir safnkost, sýningar og starfsfólk Byggðasafns Skagfirðinga í samráði við það.

Með vinsemd og virðingu,

f.h. stjórnar FÍSOS,
Helga Maureen Gylfadóttir

Stjórn FÍSOS skipa:
Formaður: Helga Maureen Gylfadóttir
Varaformaður: Gunnþóra Halldórsdóttir
Gjaldkeri: Jón Allansson
Ritari: Ingibjörg Áskelsdóttir
Meðstjórnandi: Linda Ásdísardóttir
Varamenn: Haraldur Þór Egilsson og Hjörtur Þorbjörnsson

 

Eftirfarandi bréf er birt á heimasíðu FÍSOS sem og á samfélagsmiðlum félagsins.
Bréfið er einnig sent til fjölmiðla.

Farskóli 2018 – Lokadagur skráningar 28. febrúar 2018

Kæru safnmenn,

tíminn æðir áfram og nú er bara ein vika til stefnu fyrir þá sem eiga enn eftir að skrá sig á farskóla safnmanna í Dublin.

Lokað verður fyrir skráningu á miðnætti miðvikudag 28. febrúar.

Skráning fer fram á vefsíðu FÍSOS, sjá undir flipanum Farskóli.

Greiða þarf 35.000 kr. staðfestingargjald í síðasta lagi 1. mars á reikninginn 0301-26-074634 (kt. 441089-2529).

Staðfestingargjald fæst ekki endurgreitt. Munið að geta nafns ykkar í tilvísun.

Farskóli í Dublin 11. – 14. september 2018
Drög að dagskrá

11. september
Flug um morgun til Dublin.
Farið verður beint af flugvelli í hádegisverð á kastalaslóðir til Malahide og að því loknu verður útsýnisferð um Dublin.
Eftir að fólk hefur bókað sig inn á hótel um kl. 15 verða fyrstu söfnin heimsótt í hópum.
Um kvöldið getur fólk valið að fara í bókmennta- og pöbbagöngu í fylgd heimamanna eða ráða sér sjálft.

12. september
Safnaheimsóknir í hópum fyrir og eftir hádegi.
Gina O’Kelly, formaður The Irish Museums Association, mun halda erindi.
Í lok dags heimsækir allur hópurinn sýningu Guinness-verksmiðjunnar í Dublin.

13. september
Safnaheimsóknir fyrir hádegi í hópum.
Seinni partinn verður frjáls tími. Fólk er hvatt til að heimsækja söfn og sýningar að eigin vali.
Árshátíð og dansiball um kvöldið.

14. september
Heimför.

Dæmi um söfn sem verða heimsótt í ferðinni:

• The National Museum of Ireland (Archaeology, Natural History og Decorative Arts & History)
• The Tenement Museum
• GPO
• The National Gallery of Ireland
• Chester Beatty Library
• Kilmainham Gaol
• The Little Museum of Dublin
• Epic – the Irish Emigration Museum
• Irish Museum of Modern Art
• Photographic Archive
• The Book of Kells & Old Library
• Hugh Lane Gallery
…og mörg fleiri!

Kærar kveðjur,
Helga, Hlín og Þóra

Textílnámskeið – Sýning, pökkun og geymsla textíla á söfnum

Staður: Borgarsögusafni Reykjavíkur – Árbæjarsafni
Stund: Mánudaginn 23. apríl 2018, kl. 9.00 – 16.00

Námskeiðið byggir á handbókinni: Sýning, pökkun og geymsla textíla á söfnum eftir Þórdísi Baldursdóttur forvörð, sem leiðbeinir á námskeiðinu.

Fjallað verður um fyrirbyggjandi forvörslu textíla í safngeymslum og á sýningum, til dæmis meðhöndlun, uppsettningu, hirslur og umhverfi. Skoðaðar verða mismunandi pökkunaraðferðir fyrir ólíkar gerðir textíla sem algengir eru á íslenskum söfnum.

Textílgeymsla Borgarsögusafnsins í nýju varðveisluhúsi, Vörðunni, í Árbæjarsafni verður heimsótt. Undirstöðuatriði við gerð búningagínu verða kynnt og þátttakendur búa til sérsniðin þrívíð form fyrir textíla frá eigin safni.

Handbókin er aðgengileg á heimasíðu Íslandsdeildar, Félags norrænna forvarða, nkf.is/itarefni og á heimasíðu safnaráðs.

Námskeiðið er samstarfsverkefni FÍSOS og NKF – Ísland. Safnaráð og Mennta – og menningarmálaráðuneytið styrkja námskeiðið.

Námskeiðið er eingöngu ætlað félagsmönnum FÍSOS, sem starfa með safnkost.
Hámarksfjöldi þátttakenda: 8
Námskeiðið er án endurgjalds

Frekari upplýsingar og skráning:
Þórdís Anna Baldursdóttir
forvarslan@gmail.com
gsm: 8462534

Tilkynning frá farskólastjórn vegna Farskóla safnmanna 2018

Kæra safnafólk.

Farskóli safnmanna 2018 verður haldinn dagana 11. – 14. september í Dublin.

Wow ásamt Gaman ferðum munu sjá um að koma farskólanemum á áfangastað og gist verður á O’Callaghan Hotels. Um er að ræða þrjú hótel: The Alex Hotel, The Davenport Hotel og The Mont Clare Hotel sem eru einungis í um mínútu göngufæri hvert við annað. Hótelin eru staðsett á góðum stað í miðborginni (http://www.ocallaghanhotels.com/about-us/ ) og stutt að fara þaðan á helstu söfn borgarinnar.

Tilkynnt verður um heildarupphæð ferðar, staðfestingargjald og skráningu á næstu dögum. Í boði verða tveir verðpakkar þar sem eitt hótelanna býður ódýrari gistingu.

Fjöldi þeirra sem komast í farskólann mun takmarkast við 120 manns svo það er um að gera að skrá sig sem fyrst þegar opnað hefur verið fyrir skráningu.

Skráningarsíða fyrir farskólann verður sett upp í næstu viku á heimasíðu FÍSOS  þar sem hægt verður að skrá sig í ferðina.

Síðar verður haft samband við farskólanema og þeim kynnt dagskrá farskólans. Þeim gefst þá færi á að skrá sig í safnaheimsóknir og ferðir sem boðið verður upp á.

Það er mér sönn ánægja og heiður að vera skipuð farskólastjóri í ár. Hlín Gylfadóttir og Þóra Sigurbjörnsdóttir sitja með mér í farskólanefnd og vinnum við hörðum höndum þessa dagana að því að undirbúa fróðlegan og skemmtilegan farskóla.

Hlökkum til að hitta ykkur í Dublin í haust!

Helga Einarsdóttir, Hlín Gylfadóttir og   Þóra Sigurbjörnsdóttir

keep-calm-we-re-going-to-dublin-2

Farskóli 2018 – Farskólastjórn

Stjórn FÍSOS kynnir með ánægju og stolti farskólastjórn FÍSOS 2018.

Farskólastjóri er Helga Einarsdóttir hjá Þjóðminjasafni Írlands og meðstjórnendur eru Hlín Gylfadóttir hjá Borgarsögusafni Reykjavíkur og Þóra Sigurbjörnsdóttir hjá Hönnunarsafni Íslands.

Farskólastjórn hefur nú þegar hafið störf og vinnur nú að fá tilboð í flug og hótel ásamt því að leggja drög að safnaheimsóknum á Írlandi.

Þær munu á næstu vikum kynna hvaða daga í september 2018 verður haldið út í víking ásamt upplýsingum um kostnað.

Netfang farskólastjórnar er farskoli@safnmenn.is en við biðjum félaga að hinkra með fyrirspurnir þar til fyrsta kynning er afstaðin.

Það er vissa stjórnar FÍSOS að farskólinn 2018 er í öruggum höndum þessarar heiðurs-kvenna og miðað við það sem þegar hefur verið rætt eiga félagsmenn FÍSOS von á fróðlegum, skemmtilegum og óvæntum farskóla.

Stjórn FÍSOS.

Dublin

TILKYNNING – Póstlisti félagsins, safnmenn@safnmenn.is, liggur niðri.

Því miður liggur póstlisti safnmanna, safnmenn@safnmenn.is,  enn niðri síðan kerfishrun varð hjá hýsingaraðilanum 1984.

Stjórn FÍSOS ákvað á stjórnarfundi 14.12 sl. að bíða fram yfir áramót í von um að endurheimta póstlistann en ef ekki úr rætist verður leitað annarra leiða.

Biðum við félagsmenn að nýta sér fésbókarhópa félagsins til að koma tilkynningum frá sér en önnur mál má senda á stjorn@safnmenn.is

https://www.facebook.com/safnmenn/

 

Farskóli 2018 verður á Írlandi

Á aðalfundi félagsins þann 27. september 2017 var samþykkt að halda Farskólann 2018 á erlendri grundu.

Stjórn FÍSOS efndi til kosningar á meðal félaga um áfangastað. Alls tóku 92 þátt og féllu atkvæði þannig:

Amsterdam – 24

Dublin – 28

Pólland – 12

Ísland – 9

Færeyjar – 6

Stokkhólmur – 8

Annað – 5

Í ljósi þessarar niðurstöður var efnt til annarrar kosningar þar sem valið stóð á milli Dublin eða Amsterdam.

Alls tóku 81 félagsmaður þátt  og féllu atkvæði þannig:

Dublin – 51,9% (42 atkvæði)

Amsterdam – 48,% (39 atkvæði)

Stjórn hefst nú handa við að skipa farskólanefnd og vinna að skipulagningu ferðarinnar til Írlands.

Gert er ráð fyrir því að fara í september 2018.

Þeir félagar sem hafa áhuga á að taka þátt í undirbúning ferðarinnar eða hafið góð sambönd á Írlandi sem gætu nýst við skipulagninguna vinsamlegast setjið ykkur í samband við stjórn félagsins, stjorn@safnmenn.is

keep-calm-we-re-going-to-dublin-2

Aðalfundarboð 2017

Stjórn FÍSOS – Félags íslenskra safna og safnmanna boðar hér með til aðalfundar miðvikudaginn 27. september 2017 kl. 13.30 á Kaffi Rauðku, Gránugötu 19, Siglufirði.

Dagskrá aðalfundar:

1. Kosning fundarstjóra og fundarritara.

2. Skýrsla stjórnar um störf félagsins.

3. Reikningar félagsins lagðir fram.

4. Lagabreytingar.

5. Ákveðið árgjald félagsmanna og stofnana.

6. Kosning í stjórn og aðrar trúnaðarstöður

  • kosið verður um stöðu varaformanns, gjaldkeri og ritari.
  • kosið verður um stöðu eins varamanns.
  • Kosning eins skoðunarmanns reikninga til tveggja ára.

8. Farskóli 2018.

9. Heiðursfélagar.

10. Önnur mál.

  • Safnablaðið Kvistur
  • Fyrirlestrarröð FÍSOS – næstu skref.
  • Safnadagurinn 18. maí – fyrirkomulag og frekari framhald.


Stjórn FÍSOS leggur til breytingar á lögum félagsins sem fylgja hér með í viðhengi. Félagsmenn eru hvattir til að kynna sér vel fyrirhugaðar breytingar.

Tillögur að lagabreytingum á lögum FÍSOS
Óskað er eftir framboðum til stjórnar í stöðu varaformanns, gjaldkera, ritara og varamanns. Áhugasamir geta lýst yfir framboði með því að senda tölvupóst á stjorn@safnmenn.is eða lýst yfir framboði á aðalfundi. Kjörgengi hafa þeir félagsmenn sem greitt hafa árgjald félagsins fyrir aðalfund eða eru heiðursfélagar.

Listasafn Reykjanesbæjar

Listasafn Reykjanesbæjar“Dýrin mín stór og smá” er yfirskrift 12. Listahátíðar barna í Reykjanesbæ sem nú stendur sem hæst. Hátíðin er samstarfsverkefni Listasafns Reykjanesbæjar, allra 10 leikskólanna, allra 6 grunnskólanna, Tónlistarskóla Reykjanesbæjar og dansskólanna.

Það er gríðarlega fjölbreytt dýralíf í húsunum um þessar mundir og hvetjum við alla sem vettlingi geta valdið að líta við hjá okkur á þessar frábæru sýningar sem vekja mikla hrifningu jafnt hjá börnum sem fullorðnum.

Sýningarnar standa til 21. maí. Opið er alla daga frá kl. 12 – 17 og er aðgangur ókeypis.

Náttúrufræðistofa Kópavogs

Geirfugl_low_resÁrið 1844 veiddu Íslendingar síðustu geirfuglana og útrýmdu þar með tegundinni. Náttúrufræðistofa Kópavogs tekur þátt í alþjóðlega safnadeginum 2017 og vinnur með þema dagsins, söfn og erfiðar sögur, með því að vekja athygli á örlögum geirfuglsins með uppsetningu í anddyri safnsins. Geirfuglinn var eitt sinn var útbreiddur við Norður-Atlantshaf, en laut endanlega í lægra haldi fyrir gegndarlausri ofveiði og söfnunaráráttu mannsins. Varpað er fram spurningum varðandi umgengni og viðhorf okkar til náttúrunnar nú á tímum, þegar framboð af upplýsingum hefur aldrei verið meira og aðgengi að þeim aldrei greiðara.

Heimasíða Náttúrufræðastofu Kópavogs

Listasafn Árnesinga

Listasafn Árnesinga

Alþjóðlegi safnadagurinn 18. maí – dagskrá í Listasafni Árnesinga:

HEIMKYNNI – Sigrid Valtingojer og ÓÞEKKT – Tinna Ottesen   kl. 12:00-18:00
Í Listasafni Árnesinga standa nú tvær sýningar sem báðar eiga erindi við yfirskrift safnadagsins í ár, sem er Söfn og umdeild saga: Að segja það sem ekki má segja í söfnum. Báðar sýningarnar taka á erfiðum umræðum í samfélaginu í dag því auk þess að kynna áhugaverð listaverk þá tengist Sigrid Valtingojer málefnum flóttamanna og lét sér þau varða og Tinna Ottesen veltir upp áhugaverðum hugleiðingum m.a. um tengsl okkar við náttúruna.
Sjá nánar á www.listasafnarnesinga.is

ÓPERAN GILITRUTT eftir Þórunni Guðmundsdóttur  kl. 18:00
Söfn eru vettvangur samskipta og á safnadaginn, fimmtudaginn 18. maí kl. 18:00 verður boðið upp á sýningu á óperunni Gilitrutt eftir Þórunni Guðmundsdóttur. Flytjendur eru söngnemendur, eldri strengjasveit og blásarar frá Tónlistaskóla Árnesinga.
Flutningur óperunnar tengist þema vetrarins hjá skólanum sem er „Kventónskáld“.

Aðgangur að safninu og óperunni er ókeypis og allir velkomnir.

Listasafn Einars Jónssonar

Tangolistasafn

Þann 18. maí er alþjóðlegi safnadagurinn haldinn hátíðlegur í söfnum víða um heim. Á Listasafni Einars Jónssonar verður dansaður argentínskur tangó í tilefni dagsins. Frá klukkan 20 til 21 sér Helen La Vikinga Halldórsdóttir tangókennari um tangókennslu og í framhaldi verður dansleikur, eða milonga eins og það er kallað meðal tangódansara, til klukkan 23.

Allir velkomnir og aðgangur ókeypis (en frjáls framlög eru þegin með þökkum).

Tangó varð til og þróaðist meðal innflytjenda af lægri stéttum í Buenos Aires undir lok 19. aldar. Fljótlega breiddist hann út um heimsbyggðina og sló í gegn í París og Bandaríkjunum undir 1920. Tangóhefðin hefur lifað tímana tvenna og þykir nú ástæða að vernda hana og er argentínskur tangó núna á lista UNESCO yfir ómetanleg menningarverðmæti sem njóta friðunar.
Það fer vel á því að dansa tangó á Listasafni Einars Jónssonar á alþjóðlega safnadeginum en safnið var byggt á þeim tíma sem tangóinn ruddi sér hressilega til rúms í heiminum. Og að áliti sérfróðra er safnið ein fárra íslenskra 20. aldar bygginga sem einnig ættu að eiga sess á lista UNESCO

Heimasíða Listasafns Einars Jónssonar

Gljúfrasteinn

 

GljúfrasteinnViltu gægjast inn um stofuskápana hjá Auði og Halldóri? Gljúfrasteinn tekur þátt í alþjóðlega safnadeginum 18. maí með því að færa heimilið úr klæðum safnsins þegar degi fer að halla og hleypa þannig gestum enn nær heimilislífinu en gert er aðra safndaga ársins.

Tónlist á fóninum, skápar opnaðir og munir dregnir fram, túrkísbláar flísar baðherbergisins fá að njóta sín fyrir opnum dyrum, Mosfellsdalurinn séður frá svölum skáldsins, þá verður eldhúsinu flíkað alþýðlega og loks gera starfsmenn hreint fyrir sínum dyrum.

Gljúfrasteinn verður opinn frá 10-22 á safnadaginn og dagskráin hefst kl. 18.

Heimasíða Gljúfrasteins

Byggðasafn Snæfellinga og Hnappdæla

 

17834091_10155136839603397_5275422945243592928_oByggðasafn Snæfellinga og Hnappdæla tekur þátt í alþjóðlega safnadeginum með viðburði í tengslum við sýninguna Ferming 2017 – Í fullorðinna manna tölu.

Nokkrir aðilar munu segja frá sinni fermingarupplifun, sunnudaginn 21. maí 2017 kl. 15:30.

Á sýningunni eru fermingarmyndir frá hinum ýmsu tímabilum, unglingaherbergi í anda áranna 1985-1995 , fermingargjafir sem og fermingargjafaauglýsingar allt frá 19. öld til dagsins í dag.